المقال ده هيكون جامع لأهم الأعمال اللي ممكن يعملها محامي جدول عام في أول شهور من عمله في أي مكتب، يعني من الاخر لو انت لسه منزلتش وخلاص على وشك تنزل مكتب ركز معايا علشان الكلام ده هيكون مهم جدا لك.
مراحل سير الدعوي لازم يكون واضح في ذهنك أوي علشان ده أساس أي عمل هتقوم به طول فترة عملك بالمحاماة، واعتبرها أهم من التفاصيل الصغيرة اللي ممكن تعرفها لإن أي معلومة لازم تحطها في المكان الصح.
علشان كدة كان أهم معلومة انك تعرف إن مراحل الدعوى هي:
- قيد الدعوى لدى المكتب الامامي.
- إعلان الخصوم بأصل صحيفة الدعوى.
- حضور الجلسة وتقيدم حوافظ المستندات.
- معرفة قرار القاضي أو الحكم لو اخر جلسة.
طيب دي نبذة مختصرة جدا عن إجراءات التقاضي بشكل عام فيما يخص الدعاوى المدنية، اللي هي شخص متضرر بيروح لمحامي يوكله ينوب عنه في أخذ حقه، ثم المحامي يكتب صيغة الدعوى ويروح يودعها في المكتب الأمامي، ثم يعلم المدعى عليه عن طريق المحضرين، ثم ينتظر الجلسة ليقدم حفاظة مستنداته لإثبات حقه، ثم ينتظر أخر الجلسة لمعرفة القرار من السكرتير.
المدعي عليه مش هيسكت في أول جلسة هتلاقيه بيطلب أجل سواء للإطلاع أو لتقديم المذكرات أو تفاصيل تانية إلى أن يحجز القاضي الدعوى للحكم وهنا بتروح تعرف الحكم ايه وتاخد صورة رسمية منه.
انت كمحامي بقي في بداية طريقك في أي مكتب محاماه ، الأستاذ هيحركك في الاول في الأعمال البسيطة زي:
- تسليم واستلام الإعلانات:
وده عمل روتيني جدا مش محتاج أكثر من انك تاخد من المكتب الإعلان وتعرف هو تابع لمحضرين أي منطقة، وبتروح تسلمه لرئيس قلم المحضرين بيكتبلك عليه رقم وليكن: 48573 بتاريخ 18\7\2109 علشان لما تروح تستلمه بتسأل عليه بالرقم فقط ولو نسيت الرقم بتدور عليه بالتاريخ ولو اسمك مش على الصحيفة بيكون معاك توكيل من الاستاذ المحامي بتستلمه به وبتمضي في الأجنده وتكتب رقم الكارنيه بتاعك.
- معرفة القرارات:
وده أيضا عمل روتيني بتعرف رقم الدعوى من المكتب وتروح للسكرتير بتلاقي عنده الأجندة بتفتحها بالتاريخ واليوم وتدور علي رقم الدعوى وهتلاقي جمبيها القرار ولو كانت الجلسة محجوزة للحكم فهتلاقي الأحكام في أخر الأجندة بتنقله وبتبلغ به الأستاذ المحامي اللي شغال معاه.
- معرفة رقم الصادر والوارد:
دا بيكون رقم المحكمة بتصدر به ملف القضية لمحكمة تانية او للخبراء مثلا ولما بيوصل بياخد رقم تاني الأول بيكون صادر والثاني بيكون وارد لأن أغلب المعاملات دي رسمية فلازم يكون في تسجيل في أجندة لبيان صحة استلام وتسليم الملفات بشكل يضمن الجدية ويعبر عن المسؤلية، انت بتعرف الرقم علشان تعرف تتابع الاجراءات ماشية ازاي وايه اللي مفروض تعمله.
- كتابة المذكرات:
في محامين كبار بيكون همه الاول انه يساعد المحامي المبتدئ انه يعلمه يكتب مذكرات علشان يفهم صحيح القانون، ويخليه يبدأ يجمع أكبر حصيلة لغوية قانونية علشان تساعده فيما بعد، الأمر دا في غاية الأهمية ومفيد جدا، وده طبعا بيكون في المكتب، واعتقدها مهارة مهمة جدا لأي محامي كبر أو صغر، مش شرط تكون من إعداده ممكن تكون علي ورق وهو ينقلها فقط علي الكمبيوتر.
ولو انت نبيه شوية وباين عليك ذكي الاستاذ ممكن يحركك في حضور جلسة تطلب فيها أجل للإطلاع مثلا - ممكن يخليك تروح تعمل شهادة من واقع الجدول - شهادة بعدم حصول استئناف - تعرف اذا المتهم عارض في جنحة من عدمه - صورة رسمية من حكم - صورة ضوئية من ملف القضية - صورة من تحقيق نيابة وتفاصيل كتيير واجراءات إدارية كل ما تزيد خبرتك كل ما هتعرفها وتتقنها وتعرف هي في أنهي مرحلة من مراحل التقاضي.
الكلام ده ممكن يكون بسيط للبعض لكنه مهم جدا لأي شخص ناوي ينزل في مكتب، لحمد لله ربنا كرمنا بزملاء وأساتذة لم يبخلوا علينا بأي معلومة، لو عايز تنجح في المحاماة نصيحة مني اوعى تبطل سؤال، السؤال هو اللي هيعلمك بعد توفيق ربنا سبحانه وتعالى.
