– التعامل مع الشرطة:
١- المظهر مهم جدا جدا جدا ياريت حضرتك متروحش القسم إلا وانت حسن المظهر، وحط تحت حسن المظهر مليون خط.٢- لو اتكلمت مع أحد الضباط أرجوك لا داعي للتفخيم والتعظيم فهو كده كده مش شايف إلا نفسه، اتكلم بأدب ووقار وحزم، وحدد طلبك باختصار، وبلاش كلام كتير لا يسمن ولا يغني من جوع.
٣- لو حضرتك في القسم حاول إن يكون كلامك مع أكبر رتبة لإنه ديما هيكون متفاهم عن صغار الضباط، ومتتكلمش مع صغار الضباط إلا للضرورة لأنه مش هيفيدك فى شيء ولإن دورنا عمليا يبدأ فى النيابة العامة وأمام المحكمة.
– التعامل مع النيابة:
١- اتعامل باحترام واعرف حقوقك كويس جدا وواجباتك امام النيابة.٢- متطلبش شئ مش من حقك، علشان كده لازم تكون عارف كويس جدا التعليمات العامة للنيابات.
٣- عضو النيابة ديما بيحترم المحامى الفاهم، أرجوك افهم كل تفصيلة صغيرة في قضيتك.
٤- لو حصل خلاف مع أحد الوكلاء بلاش تنفعل علشان حقك ميضعش ادخل لرئيس النيابة مباشرة وضحله مشكلتك بدون انفعال وبدون خوف انت محامي وكان ممكن تبقي مكانه في يوم من الأيام، وخليك متزن في رد فعلك ومتجادلش إلا بعلم.
– التعامل مع القاضي:
١- قبل متدخل القاعة متنساش تقفل موبايلك أو تعمله صامت.٢- أرجوك أرجوك ارتدي الزي الرسمي "البدلة" وبلاش الزي العادي، بدلتك هي اللي بتميزك عن باقي الناس اللي في المحكمة، احترم مهنتك علشان تحترمك.
٣- لو حضرتِك محامية أرجوكي احترمي مهنتك وارتدي زي محترم وبلاش أفوره في الميكب انتي مش في فرح بنت خالتك.
٤- اتكلم بوضوح وبصوت مسموع، وبلاش تستخدم ايدك في حركات عشوائية ومرتبكة لما تتكلم قدام القاضي، خليك متزن.
٥ - اقرأ الدعوى كويس ورتب دفاعك ومذكراتك و مستنداتك، واحرص دايماً في غير الجنايات انك تكتب مذكرة محترمة بدفاعك، فالقضاه اليوم قدامهم أطنان من القضايا، ومفيش حد هيفتكر مرافعتك مهما كانت عظيمة.
٦ - حافظ علي التواصل البصري بينك وبين القاضي، علشان تقدر تشد انتباه المحكمة.
٧ - لو مفهمتش أو مسمعتش السؤال اللي طرحه القاضي أو أي طرف في الدعوي اطلب بأدب إعادة السؤال، مش عيب علي فكرة.
٨- محامي خصمك هو زميل لك خارج اسوار المحكمة، داخل القاعة كل واحد لازم يتعامل علي إن دي أهم قضية في حياته، دي حقوق ناس سعادتك.
مهنة المحاماه مهنة عظيمة بدون أي جدال، بس تصرفاتنا هي اللي بتحدد ان اللي قدامنا يحترمنا أو لأ، متفتكرش لما تعمل تصرف مش كويس انك كده بتهين لنفسك بس، لأ، انت بتهين لكل محامي بيمارس المهنة.