بقلم د. محمد الصادق
تخيل لو انت موظف وتفاجئت آخر الشهر قالولك الراتب هيتأخر أسبوعين، أو مفيش راتب الشهر ده، رد فعلك هيكون ايه؟!ده بالظبط بيكون شعور المحامي لما تتأخر عليه في أتعابه المتفق عليها كلنا عندنا ظروف وعندنا التزامات، وممكن المحامي يكون وراه التزامات معينة مرتب إنه يخلصها بالأتعاب اللي عندك.
لذلك دول أهم 10 نصائح للمحامين المبتدئين:
- ما تتحركش من مكانك قبل ما تاخد أتعابك.
- اتفق علي تقاضي مؤخر دفع الأتعاب قبل دخولك آخر جلسة في القضية، لإما تعتبر مؤخر الأتعاب أموال معدومة وتستعوض ربنا فيها.
- إياك ومصاحبة الموكل وإياك ترفع الكلفة بينكم، وخلي دايماً بينكم مسافة وحدود لا يتخطاها عشان تفرض عليه احترامك وبالتالي مايتدخلش في شغلك.
- الموكل اللي يغلط في زميل ليك كان محاميه السابق، اعرف انها مسألة وقت وهيروح يغلط فيك عند محامي زميل تاني، فامتسمحلوش بالتطاول على أي زميل محامي.
- الموكل اللي يتعبك في التعامل، اوعى تشتغلّه قضايا تانية، لإن الطبع غلاَّب ، وهيطلع عينك كل شوية وخسارتك هتكون أكبر.
- ماتذلِّش نفسك لحد عشان فلوس.
- خلي عندك قناعة ان الموكل هو اللي محتاجلك مش انت اللي محتاج فلوسه، أتعابك دي ما هي إلا المقابل العادل لاحتياجه ليك، وليس العكس.
- أول بأول عرف موكلك الوضع بشكل ملائم وبكياسة شديدة وخليك صادق معاه والتزم باللي تقدر عليه واوعي تديله أمل زائف.
- حاول يكون ليك مصادر دخل متعددة، سواء من المحاما ة أو من خارج المحاماة.
- بقدر علمك بقدر ما هتكون قيمتك، وبقدر قيمتك بقدر ما هيكون احتياج الناس ليك.